اخر كلام علشان محدش يتكلم عن عمرو وتامر تانى

بسم الله الرحمن الرحيم



اولا مساء الخير على أعضاء شباب جديد
ومساء خاص على فانس عمرو دياب و لفانس تامر حسني

تحذير : الموضوع موجه لأصحاب النفس الطويل يعني م الآخر العالم اللي نفسها قصير واللي بتتخنق بسرعه يا ريت ماتقراش
احسن
طبعا بعد الكلام اللي كتر ف المنتديات العربية عن عمرو وتامر
وبعد الحرب اللي اشتعلت على صفحات مزيكا اكس
بين فانس عمرو وتامر
واللي استخدم الطرفين فيها كل الأساليب المشروعه وغير المشروعه

وانا آسف لو قلت ان إدارة الموقع تخاذلت شويه ف مراقبة محتوى المواضيع والكلام اللي جه فيها
وكمان الردود البشعة التي لا تليق بسمعة المطربين ولا تليق بمكانة مزيكا اكس
ومش عارف هل ده تخاذل فعلا من ادارة الموقع
ولا ده عدم سيطره
ولا ده انتو سيبتوا الموضوع مفتوح عالبحري
عشان المواضيع تزيد والردود تزيد وكده
المهم ياريت ادارة الموقع تعيد النظر مره اخرى

وقبل ما ابتدي انا حبيت أعمل موضوعي ده
وبدون تحيز لحد من المطربين
هانقول بكلام بسيط وادله واضحه
ده ليه ايه وعليه ايه
وكمان ده ليه ايه وعليه ايه

وقررت اني انشر الموضوع
على منتدى فانس عمرو
وكمان منتدى فانس تامر

بس ياريت طلب من حضراتكم
ياريت تقروا الموضوع براحه و واحده واحده
وانا مش عاوز منكم ردود
و اللي مصر انه يكتب رد
ياريت يكون منطقي
وبأدله
ومايكونش خارج عن حدود اللياقه
اوك ياشباب


ياللا نبدأ

احب أقول الأول اني ديابي
وبحب الكينج عمرو دياب

استنى يا تيموري زعلت ليه من كلامي
زمانك دلوقتي بتقول ف دماغك ايه الواد ده
ده اكيد هايجي على تامر

لا طبعا مش هاجي على تيمو
ولعلمك انا بحب تامر
لأنه بيمثل الشباب
ولعلمك كمان ان حافظ كل أغانيه
من أول
أنا شكلي هاحبك ولا ايه
لحد
بهون عليكي
والدنيا ايه

المهم

هابدأ بالكلام عن عمرو دياب
بحكم السن
أوك

طبعا عمرو دياب غني عن التعريف
أول مطرب مصري يفوز بالميوزيك أوورد
أيام ماكانت فعلا جايزه واقعيه
شخص متواضع وبسيط
مابيكرهش حد
وعمرنا ماسمعنا ف يوم من الأيام انه بيهاجم حد
وعمرنا ماسمعنا عنه حاجه وحشه
ولا ايه يا تيموري
ها انته معايا ولا ايه
وانت كمان يا ديابي

عمرو دياب طبعا مطرب كبير
ولما النقاد حيوا يصنفوا مدراس الغناء ف مصر من أول ما اخترعوا الغنا
كان التصنيف كالتالي
عبده الحامولي
وبعديه
أم كلثوم
وبعديها
عبد الحليم
وبعديه
عمرو دياب

واحد يقولي ياسلام هوا ماحدش جه غير دول ولا ايه
طب مافيه محمد عبد الوهاب وفي منيره المهديه وكمان في هاني شاكر

أقوله اه يا سيدي
بس انا باتكلم عن التوب
اصحاب الخطوط العريضه
اللي بان اثرهم على استايل الغنا ف عصرهم

بعد كده نرجع لعمرو دياب
عمرو الأسطوره اللي فضل على مدار عشرات السننين متربع على قمة الغناء ف مصر والوطن العرب
شوفت يا تيموري اديك زعلت تاني
ياسيدي ماتزعلش من الحقيقه
بس ده عمرو
عمرو اللي أضاف للغناء ف مصر وف الوطن العربي الطابع الشبابي
كمان دخل لنا الآت جديده ماكناش بنسمع عنها
وتبنى كتير من الملحنين والموزعين الشباب

طب ليه لما الإنسان ده يحاول يجتهد
ويخطط و يسهر عشان يطلع لك موسيقى نضيفه تسمعها
ويقولك ارتقي بدماغك واسمع الجديد
ليه تهاجمه
وهوا ماحاولش ف يوم الأيام يأذيك يا تيموري
الصراحة الراجل ف حاله
وعمره ماجاب سيرة حد
يبقى ليه تهاجمه

طب بلاش
ارجه كده لورا شويه
لأ ارجع كمان شويه
ايوه شوف بقى كل ألبومات عمرو دياب من أول ماقال يا غنى
دايما هتلاقي جديد
والله انا مش باقول كده عشان انا بحب عمرو
لا
انا بقول كده عشان دي الحقيقه

قوللي دلوقتي يا تيموري
ياللي بتحب تامر
الفنان الحساس
والصوت الجميل
قوللي يا سيدي ايه الوحش ف عمرو
ايه اللي يخليك تهاجمه بالطريقه دي
ياترى
صوته وحش
ولا آدائه وحش
ولا احساسه مش تمام
ولا موسيقته اي كلام
وسيرته مش كويسه
ولا .. ولا
دور وقوللي انت بقى

بصراحه وكلمة حق لازم تتقال من زمان
عمرو توب
وقمه وعالي

واسمع ياتيموري تامر حسني حبيبك قال عنه ايه ف لقاء على القناه الأولى
قال ان عمرو دياب مثلي الاعلي واتمني تقديم دويتو معاه
وده كان ف حوار مع عمار الشريعي

يعني تامر بيعتبر عمرو مثله الأعلى
ولك انت الكلام بقى

ليه دايما بتحب تشوه صوره عمرو دياب
مع انه الراجل ده واجهتنا بره

نرجع لعمرو
وماله
وفهمت عينيك
حكايات
تملي معاك
حنيت
صدقني خلاص
قدام عيونك
أغيب أغيب

مش عارف أقول ايه ولا ايه
ياترى لو سمعت الأغاني دي بدون تحيز
احساس
صوت موسيقى
كلمات
لحن
تقول ايه يا تيموري
بس تقول الحق

والجواب ليكم

ولا لو سمعت
بتخبي ليه
العالم الله
انا عايش وعلم قلبي
نقول ايه

وغيره
ولا تعليق

يبقى ليه الهجوم عليه
وليه نصر ان احنا نشوّه صورته
مش عارف بصراحه

القضيه التانيه
وهيا على اغنية الليله دي
وصورة الألبوم

بالنسبه للأغنية
اولا الموسيقى دي حاجه كده زي الفلكلور
تراث يعني وكل واحد قادر انه يطور فيها ويغير فيها يبقى جدير ان انا نرفع له القبعات
الكلام لو كده يبقى عمرو احسن من غيره كتير
لو شفنا فريق بوسي كات دوللز
غنى الأغنيه بنفس اللحن وده فريق عالمي
ولما الناس بتقول ان عمرو سارق الأغنيه

ليه زمااان
لما تامر غنى قرب حبيبي
ماقلناش انه سارق اللحن !
عارفين ليه
عشان ده مفهوم ان ده فلكلور
يبقى ليه نكون وحشين كده
ونغير ضمايرنا

كمان عمرو خد المقطع الأولاني من الفلكلور ده
ف أغنيه قديمه جدا ليه
قبل ما تامر يغني
يمكن ماكانش اتولد
ليه ماقلناش ان تامر سرق عمرو

بلاش تعصب أعمى

اما بالنسبه لبوستر عمرو
اللي بيقولوا انه مقلد فيه انريك اجلاسيس
انا مانكرش فعلا انه مقلد فكره البوستر
بس دول مطربين عالميين مع بعض
ولو قلنا على عمرو كده
ليه ماقلناش الكلام ده على انريك لما قلد لوك عمرو ف تملي معاك

ولا أقولك ليه اساسا جمهور انريك اجلاسيس ماقالش انه سارق عمرو ف اللوك
عارف ليه
عشان ده جمهور فاهم
وعارف ان اللوك ده مش ملك لحد
وده خط موضه
وده مش كلامي
وكمان مش كلام الجرايد والمجلات
ده كلام كريم نور مصمم بوستر عمرو

وبعدين مش للدرجه دي ان انا نقول ان عمرو سارق البوستر
مش معقول عمرو هايكون عارف او شاكك بنسبة 1 ف الميه انه هايواجه نقد ف مصر او ف أي مكان ف العالم او يتقاله انه

سرق !
ويصمم انه يقلد البوستر ولا الأغنيه
كان ممكن يعمل اي لوك تاني او اي بوستر تاني
والأفكار مابتخلصش

بس عارفين احنا قولنا عليه كده ليه
عشان احنا جمهور جاهل
ايوه جاهل ومالناش ف أي حاجه

وانا من هنا احب اوجه رساله لعمرو دياب
انت ياعمرو مثلي الأعلى
بحبك قوي
انت حد فاهم موسيقى اوي وبتعرف ازاي توصل للقلب بس للأسف مش كلنا فاهمين موسيقى صح ومش كلنا بيقدر المجهود

الخارق اللي بتعمله
انت عالمي يا عمرو

بس
ياريت يا عمرو تكون قريب من الناس اكتر
وتكون قريب من جمهورك
وتكون وسطهم ونشوفك كتير ياريت تنزل هنا شويه وتبقى وسط الناس
مش بس بقلبك كمان بحضورك
وياريت توجه رساله لجمهورك انه يكون عقلاني اكتر
ومايهتمش بحد


ايه
انتوا رايحين فين
انت يا تيموري
وانت يا ديابي

الكلام لسه ماخلصش
واركن على جنب شويه يا ديابي بس خليك صاحي ومركز معايا

وتعالى بقى يا تيموري
نتكلم شويه عن تيمو
وعنكم يا فانس تيمو
بس بدون تعصب

اقرى كلامي
وليك عليا لو لقيتني متعصب ولا ضد تامر ولا قلت عليه اي كلمه مش حقيقيه ومش بالدليل
ياريت تقولي انت غلط
واوعدك اني ماكلمش تاني عنه
ولا أدخل مزيكا اكس من اساسه !

اوك ياتيموري

تامر حسني
شاب زي اي شاب طموح انسان كويس بيحسسك انه معاك وحاسس بيك ماعرفش ازاي
موهوب والموهبه دي بتاعة ربنا وهوا استغلها صح
عنده احساس عالي لدرجة انه ممكن يبكيك
صوته حلو جدا وقوي ومختلف عن الشباب الباقيين اللي هما من جيله
وقريب من قلبي قوي

الله الله
ايه يا ميمو مانت بتقول كلام حلو عن تامر اهه
يعني انت مش كارهه

اه يا تيموري بقول اللي المفروض يتقال
كمان تامر
قريب قوي من الشباب
طبعا بحكم السن
والشباب بيحبوه
وانا كمان بحبه

وخد عندك
حبيبي وانت بعيد
لسه بحبك
مايحرمنيش منك
بتغيب
ارجعلي

تمام الله يبنور يا تيمو
بيرفيكت

وكمان دول
قرب حبيبي
شكلي هاحبك
يا بنت الإيه

وغيره من الأغاني الرائعه
ايه رأيك ياسي ديابي

الله في ايه تاني يا تيموري
يا عم ميمو انت عمال تقول كلام حلو عن تامر امال ايه اللي مزعلك منه

اقوللك يا سيدي ايه اللي مزعلني من تيمو
هما حاجتين

اولا وده المهم
انتوا يا فانس تامر بتحبوه
صح
اه ياعم طبعا بنحبه دا احنا نفديه بروحنا وقلوبنا وبنمووت فيه ومانقدرش نعيش من غيره

حلو جدا
واللي بيحب انسان المفروض يعمل معاه ايه

المفروض يقف جنبه
وايه كمان
ويساعده
وايه كمان
مش عارف قول انت يا ميمو
أقولك انا !
المفروض لو انا بحب حد اكون تمام معاه
يعني اسانده طول ماهو صح
واصلحله لو غلط وافهمه انه غلط
وده اللي مش عاجبني فيكوا يا فانس تامر انكوا دايما معتبرين ان تامر على حق ودايما بلاحظ عليكوا التعصب الأعمى لتامر بمعنى

ان تامر دايما هوا الصح ومابيغلطش ف حد و مابيزعلش حد
يمكن يكون ده شعوركم
انما احب اقول لكل التيموريين
انتوا كده غلط
صدقوني انتوا كده مش بتدافعوا عن تامر
انتوا كده بتضروه يعني انا مثلا لما اغلط ف حاجه والاقي اللي يدافع عني بالطرقه دي اكيد هافضل اغلط ومش هايهمني حد
وغير كده كمان كل ماتامر يحصله حاجه تقولوا ده اصل عمرو هوا اللي مدبر الحوار ده
ده اصل جمهور عمرو هوا اللي عامل كده
وكلام كتير مش عارف ايه فايدته
انا والله بحبكم قوي يافانس تامر عشان كده لازم اقولكم انتوا غلطانين ف ايه
طيب يا فانس تامر
معقول عمرو هايحط تامر ف دماغه
انا مش بقول كده تقليلا من شأن تامر
بس انا وانتوا عارفين كويس ان دي مش دماغ عمرو
لكن ده تعصب اعمى
معلش ف الكلمه
لكن ده فعلا تعصب اعمى

كمان النقطه اللي بتزعلني قوي منكم
انكم بتبالغوا شويه .. لما تقارنوا تامر بعمرو .. صح

ايه ياميمو انت بتقول ايه
انت هاتلخبط ولا ايه
ياعم تيموري ماتفهمنيش غلط
اولا المقارنه مفتوحه بين اي اتنين ف مجال واحد

يعني انت قصدك يا ميمو اننا ينفع نقارن بين عمرو مثلا وعماد بعرور
اقولك اه يا ديابي
ينفع
بس تكون مقارنه عادله

اما بالنسبالك يا تيموري
الغلط انك تغالط نفسك
وتقول ان تامر احسن من عمرو
وتامر التوب والكلام ده
ياسيدي هاتلي دليل ان كلامك صح بس يكون حقيقي
وانا اول واحد هايقول وراك آمين

يمكن تامر فنظرك بتحبه
او هوا المطرب المفضل ليك
لكن ماتوصلش انك تصنف تامر ف الأول وبعديه يبقى يجي عمرو
لأن كل المؤشرات ترجح كافة عمرو
تاريخ
وانجازات
وشعبيه "على مستوى العالم"
وعدد البومات
وسيره ذاتيه !

ياعم ماتشوف عمر بقاله كام سنه بيغني وتامر بقى له كام سنه
الله ينور عليك يا تيموري
هوا ده اللي اقصده
ماينفعش نقارن واحد بقى له يجي بتاع 20 سنه بيأدي
تقارنه بواحد بقاله بتاع 7 او تمن سنين بيغني
صح ولا لأ

انا اعترفلك ان تامر من أفضل المطربين الشباب
بس ماتقارنوش بعمرو

انا عارف انك زعلان مني ياتيموري بس دي الحقيقه
وانا ماقدرش على زعلك

تاني حاجه مزعلاني
تامر نفسه
ازاي تامر مش قادر يلاحظ انه بقى مثل أعلى لكتير من الشباب وانه بقت عليه العين
ازاي يقدر يعمل حاجه زي اللي عملها ف حوار الجيش ده !
وازاي انت يا تيموري ماتقولش لتامر كده غلط
طب بزمتك لو عمرو كان عمل كده
كنت عملت ايه

لازم ياتامر تهدأ شويه وتعقل
وتبطل سنه الغرور دي
دي مزعله منك ناس كتير قوي
وتبطل تعمل اغاني هابطه او مالهاش لزوم
ده طبعا لو عايز تستمر
لأن الجمهور والفانس العريض اللي واقف وراك مسيره ف يوم هايفهم ويعرف الواقع

وياريت كمان تحترم عمرو دياب شويه وتقدر اللي الراجل ده عمله
على الأقل مش كل متحصلك حاجه تقول عمرو

يعني ف حفلة منير واللي حصل معاك من قله من الجمهور
هما متعصبين اه
بس برضه زي ماجمهورك بيعمل
ازاي تجيلك جرأه وتطلع ع المسرح وتتكلم عن عمرو وتقول انه مأجر ناس تعمل كده
مع دي مش حفلته ولا حفلتك
وبعدين مش لازم كل شويه نسمع عنك كلام مش تمام

ياعم دي كلها اشاعت مانت عارف يا ميمو
يا تيموري المثل بيقول مافيش نار من غير كبريت

اعقل يا تامر !

و ف الأخر احب اقول كلمه لكل من

عمرو دياب
انت فنان كبير قوي
تقدم ياعمرو
بس ياريت تقرب من الناس اكتر وماتفضل عايش ف قلعتك لوحدك الناس بتزهق برضه

تامر حسني
انت حساس قوي
وانا عارف ان قلبك طيب
بس ياريت تنضج شويه
وتحترم عمرو
وتبطل تظلم الناس
لأن ربنا مابيسيبش حد يظلم حد علطول
وياريت تحترم جمهورك
لانه مسيره هايعرف يفرق

فانس عمرو
فانس فاهم مزيكا تمام
وياريت بلاش تردوا على أي حد لأنكم فانس لمطرب عالمي
خليكوا عالميين
واهمدوا شويه

فانس تيمو
انتوا فانس حماسي جدا
و بتحبوا تامر قوي
عشان كده لازم تقفوا معاه ف الحاجه الحلوه
وتغالطوه ف الحاجه الغلط
وتبطلوا تظلموا عمرو

و فالأخر ياريت ماحدش يزعل مني تاني
ولافانس تامر
ولافانس عمرو

وياريت ماكونش ضيعت وقتكم
واللي جاي اكتر بإذن الله
الموضوع منقول لللامانة